ગેરકાયદેસર બાઈક ટેક્સી સેવા મુદ્દે ગૂગલ અને એપલને નોટિસ,
મુસાફરોની સુરક્ષા બન્યો મુખ્ય મુદ્દો
મહારાષ્ટ્રમાં એપ આધારિત બાઈક ટેક્સી સેવાઓને લઈને હવે વિવાદ વધુ ગરમાયો છે. રાજ્યના સાયબર વિભાગે Ola, Uber અને Rapido જેવી કંપનીઓ સામે કડક કાર્યવાહી શરૂ કરતાં Google અને Appleને નોટિસ પાઠવી છે. આ નોટિસમાં બાઈક ટેક્સી સેવાઓ ચલાવતી એપ્સને પ્લે સ્ટોર અને એપ સ્ટોર પરથી દૂર કરવાની માંગ કરવામાં આવી છે.
મહારાષ્ટ્ર સાયબર વિભાગે માહિતી પ્રૌદ્યોગિકી અધિનિયમ 2000ની કલમ 79(3)(b)નો ઉલ્લેખ કરતાં જણાવ્યું કે રાજ્યમાં હાલ ચાલી રહેલી બાઈક ટેક્સી સેવાઓ કાનૂની અને નિયમનાત્મક માળખાનું ઉલ્લંઘન કરે છે. વિભાગના જણાવ્યા અનુસાર, આ પ્લેટફોર્મ્સ પાસે જરૂરી મંજૂરીઓ, સરકારી સ્વીકૃતિઓ અને ટ્રાન્સપોર્ટ વિભાગના નિયમોનું પાલન નથી.
મહિલાઓની સુરક્ષા અને અકસ્માતોની ચિંતા
રાજ્ય સરકાર ખાસ કરીને મુસાફરોની સુરક્ષા મુદ્દે ગંભીર દેખાઈ રહી છે. નોટિસમાં ડ્રાઈવરોની યોગ્ય ચકાસણી, વીમા સુરક્ષા, મહિલાઓ માટેની સલામતી વ્યવસ્થા અને ઇમરજન્સી સહાય સિસ્ટમ પૂરતી ન હોવાની ચિંતા વ્યક્ત કરવામાં આવી છે. તાજેતરમાં બાઈક ટેક્સી સેવા સાથે જોડાયેલા એક ગંભીર બનાવમાં મહિલાના મૃત્યુ બાદ આ મુદ્દો વધુ ચર્ચામાં આવ્યો છે.
પરિવહન મંત્રી પ્રતાપ સરનાઈકે સ્પષ્ટ કર્યું કે સરકાર બાઈક ટેક્સી સિસ્ટમના વિરોધમાં નથી, પરંતુ નિયમોના પાલન વિના કામગીરી ચલાવતી કંપનીઓ સામે સખત વલણ અપનાવવામાં આવી રહ્યું છે. તેમણે જણાવ્યું કે રાજ્યની નવી ઈવી પોલિસી મુજબ ફક્ત ઇલેક્ટ્રિક બાઈક ટેક્સીને જ મંજૂરી છે, જ્યારે અનેક પ્લેટફોર્મ્સ હજુ પણ પેટ્રોલ વાહનોનો ઉપયોગ કરી રહ્યા છે.
“એપ બંધ તો ગેરકાયદેસર ટેક્સી બંધ”
સરકારનું માનવું છે કે જો એપ્સને જ બંધ કરી દેવામાં આવશે તો ગેરકાયદેસર રીતે દોડતી હજારો બાઈક ટેક્સીઓ આપમેળે બંધ થઈ જશે. આ કાર્યવાહીથી મહારાષ્ટ્ર સરકાર અને એપ આધારિત ટ્રાન્સપોર્ટ એગ્રીગેટર્સ વચ્ચેનો સંઘર્ષ હવે વધુ તીવ્ર બન્યો છે. જોકે હાલ માટે કેબ, ઓટો અને ફૂડ ડિલિવરી જેવી અન્ય સેવાઓ યથાવત ચાલુ રહેશે.
