“રાહુલની કુલ આવક કરતાં પાંચ ગણો ખર્ચ કેવી રીતે?”
સંબિત પાત્રાના સવાલોથી રાજકીય ગરમાવો
નવી દિલ્હીમાં ભાજપના રાષ્ટ્રીય પ્રવક્તા સંબિત પાત્રા દ્વારા યોજાયેલી પ્રેસ કૉન્ફરન્સે રાજકીય માહોલ ગરમાવી દીધો હતો. કોંગ્રેસના સાંસદ અને લોકસભાના વિરોધ પક્ષના નેતા રાહુલ ગાંધીના વિદેશ પ્રવાસો અને તેના ખર્ચને લઈને ભાજપે અનેક ગંભીર સવાલો ઉભા કર્યા હતા.
સંબિત પાત્રાએ દાવો કર્યો હતો કે છેલ્લા ૨૨ વર્ષ દરમિયાન રાહુલ ગાંધીએ કુલ ૫૪ વિદેશ પ્રવાસો કર્યા છે અને આ પ્રવાસોમાં આશરે ૬૦ કરોડ રૂપિયાનો ખર્ચ થયો હોવાનું સામે આવ્યું છે. ભાજપના જણાવ્યા અનુસાર આ ખર્ચ રાહુલ ગાંધીની જાહેર આવક કરતાં અનેક ગણો વધારે છે, જેના કારણે હવે આ રકમ ક્યાંથી આવી અને કોણે ખર્ચ ઉઠાવ્યો તે મુદ્દે ચર્ચા તેજ બની છે.
પ્રેસ કૉન્ફરન્સ દરમિયાન પાત્રાએ જણાવ્યું હતું કે વર્ષ ૨0૧૩-૧૪થી ૨0૨૨-૨૩ વચ્ચે રાહુલ ગાંધીની જાહેર આવક અંદાજે ૧૧ કરોડ રૂપિયા રહી છે, જ્યારે વિદેશ પ્રવાસોમાં થયેલો ખર્ચ લગભગ ૬0 કરોડ સુધી પહોંચે છે. “આવક કરતાં પાંચ ગણો ખર્ચ કેવી રીતે શક્ય બન્યો? શું કોઈ વિદેશી કંપનીએ આ પ્રવાસોને ફંડ કર્યા હતા? જો હા, તો શું જરૂરી કાનૂની પ્રક્રિયાનું પાલન થયું હતું?” — એવા સવાલો પાત્રાએ મીડિયાની સામે ઉઠાવ્યા હતા.
તેમણે વર્ષવાર આંકડાઓ પણ રજૂ કર્યા હતા. ભાજપના દાવા મુજબ ૨0૧૪-૧૫માં રાહુલ ગાંધીએ ૪.૫ કરોડ રૂપિયા વિદેશ પ્રવાસોમાં ખર્ચ્યા હતા. ૨0૧૭-૧૮માં તેમની આવક ૧.૨0 કરોડ રૂપિયા હતી, જ્યારે પ્રવાસ ખર્ચ ૬ કરોડ રૂપિયા સુધી પહોંચ્યો હતો. ૨0૧૯-૨૦માં ૧.૩૯ કરોડની આવક સામે ૪.૬ કરોડનો ખર્ચ દર્શાવવામાં આવ્યો હતો.
સંબિત પાત્રાએ વધુમાં રાહુલ ગાંધીની સંપત્તિમાં થયેલા વધારાનો મુદ્દો પણ ઉઠાવ્યો હતો. તેમના જણાવ્યા મુજબ ૨૦૦૪ની લોકસભા ચૂંટણી દરમિયાન રાહુલ ગાંધીની જાહેર સંપત્તિ લગભગ ૫૫ લાખ રૂપિયા હતી, જ્યારે ૨0૨૪ની ચૂંટણીના એફિડેવિટમાં આ સંપત્તિ આશરે ૨૧ કરોડ રૂપિયા દર્શાવવામાં આવી છે. ભાજપે આ વધારાને લઈને વધુ પારદર્શકતા અને જાહેર જવાબદારીની માંગ કરી છે.
