આજકાલ સોની સબ ટીવી પર પ્રસારિત થતા ટીવી શો તારક મહેતા કા ઉલ્ટા ચશ્મા ઘણો ચર્ચામાં આવ્યો છે. હકીકતમાં સિરિયલના કથાનકને બદલે કલાકારો દ્વારા નિર્માતા આસિત મોદી પર કરાયેલા કથિતપણે ગંભીર આક્ષેપોને કારણે શો ચર્ચામાં રહ્યો છે. આક્ષેપોની શરૂઆત મિસિસ સોઢીનું પાત્ર ભજવનાર જેનિફર મિસ્ત્રી બનિસવાલથી થઈ હતી. અભિનેત્રીએ નિર્માતા વિરુદ્ધ ફરિયાદ પણ નોંધાવી હોવાનું કહેવાય છે. ત્યાર બાદ બાવરીનું પાત્ર ભજવી રહેલી મોનિકા ભદૌરિયાએ પણ આક્ષેપ કર્યો કે આસિત મોદીએ એની કરિયર બરબાદ કરવાની ધમકી આપી હતી. હવે રીટા રિપોર્ટરનું પાત્ર ભજવતી પ્રિયા આહુજા રાજડાએ પણ નિર્માતા ચોંકાવનારા ખુલાસા કર્યા છે.
અત્ર ઉલ્લેખનીય છે કે રીટા રિપોર્ટર શોમાં નિયમિત દેખાતી નથી. એનો ટ્રેક રોજબરોજવાળો નથી. આમ છતાં શોના પોપ્યુલર ફેસમાંની એક છે. તાજેતરમાં અભિનેત્રીએ એક વેબસાઇટને આપેલા ઇન્ટરવ્યુમાં જણાવ્યું હતું કે આસિત મોદીએ એને માખીની જેમ કાઢી ફેંકી દીધી. ઇન્ટરવ્યુમાં પ્રિયા આહુજાએ એ છેલ્લા થોડા મહિનાઓથી શું કામ ગાયબ છે અને તારક મહેતા કા ઉલ્ટા ચશ્માના સેટ પર કેવો માહોલ છે એ વિશ જણાવ્યું હતું. એટલું જ નહીં, એણે જેનિફર મિસ્ત્રી, શૈલેષ લોઢા અને મોનિકા ભદૌર્યાએ કરેલા માનસિક ત્રાસ અંગેના આક્ષેપો અંગે પણ પ્રતિક્રિયા આપી હતી.
પ્રિયા આહુજાએ કહ્યું કે, દિગ્દર્શક માલવ રાજડા સાથે લગ્ન કર્યા બાદ આસિત મોદી અને તેમની ટીમનો વ્યવહાર બદલાઈ ગયો હતો. એ સાથે પ્રિયાએ દાવો કર્યો કે એની સાથે અનુચિત વ્યવહાર કરવામાં આવ્યો.
શોથી કેમ ગાયબ છે અને શું કલાકારો સાથે સેટ પર ખરાબ વ્યવહાર કરવામાં આવતો હતો? પ્રશ્નમના જવાબમાં પ્રિયાએ કહ્યું કે, હા. જ્યારે કલાકારો તારક મહેતા…માં કામ કરતા હોય ત્યારે તેઓ માનસિક શોષણનો ભોગ બને છે. મેં પણ માનસિક રીતે ઘણી ઘણી તકલીફો વેઠી છે. જોકે મારા પર એની ખાસ અસર નહીં થઈ. કદાચ, માલવ રાજડા મારા પતિ છે જેઓ છેલ્લા 14 વરસથી શોનું દિગ્દર્શન કરી રહ્યા હતા.
પ્રિયાએ વધુમાં જણાવ્યું કે, માલવે જ્યારે શો છોડ્યો એ પછી મેં આસિતજીને મારા ટ્રેક વિશે પૂછવા અનેકવાર મેસેજ કર્યા પણ તેમણે કોઈ જવાબ ન આપ્યો. હા તેઓ ક્યારેક કૉમેન્ટ જરૂર કરતા કે, હવે તને કામ કરવાની શું જરૂર છે, માલવ તો કામ કરી રહ્યો છે ને. તું રાણીની જેમ તારી જિંદગી વીતાવ.
