નેહરુ બાદ મોદી એવા બીજા વડા પ્રધાન હશે જે સતત ત્રીજીવાર સરકાર બનાવશે
2024ની લોકસભાની ચૂંટણીની સમાપ્તિ સાથે જ ટીવી ચૅનલો દ્વારા કરાયેલા એક્ઝિટ પોલના આંકડાઓની જાહેરાત કરવામાં આવી હતી. લગભગ તમામ એક્ઝિટ પોલમાં ભાજપ પૂરી બહુમતિ સાથે સરકાર બનાવી રહી હોવાનું જણાય છે. તો ઇન્ડી ગઠબંધનના તમામ દાવાઓ પોકળ હોવાનું પુરવાર થઈ રહ્યું હોવાનું જણાય છે.
સાંજે છ વાગ્યે મતદાન પૂરૂં થયાના અડધા કલાક બાદ એક્ઝિટ પોલ લગભગ તમામ ચૅનલો પર દર્શાવવામાં આવ્યા હતા.
લોકસભાની ચૂંટણીના પરિણામ 4 જૂને જાહેર કરાશે. પણ રિઝલ્ટ પહેલાં લગભગ તમામ ચૅનલો અને સર્વે એજન્સીઓ દ્વૈરા એક્ઝિટ પોલ રજૂ કર્યા હતા. દેશમાં કયા પક્ષની સરકાર બની શકે છે, કઈ પાર્ટીને કેટલી બેઠક મળી શકે છે એના અનુમાનો એક્ઝિટ પોલમાં દર્શાવવામાં આવ્યા હતા.
એક્ઝિટ પોલના હિસાબે મોટાભાગના રાજ્યોમાં ભાજપ બેહતરીન પ્રદર્શન કરતી જોવા મળે છે. તો ઇન્ડી ગઠબંધનના તમામ દાવા ખોટા પુરવાર થઈ રહ્યા હોવાનું જણાય છે. અમુક એક્ઝિટ પોલમાં ભાજપ 350થી વધુ બેઠકો જીતી રહી હોવાનું દર્શાવાયું છે. ભાજપને સૌથી વધુ ફાયદો દક્ષિણ ભારતના રાજ્યોમાં થઈ રહ્યો હોવાનું જણાય છે. કેરળથી લઈ તેલંગણામાં ભાજપ વિરોધ પક્ષોના ધાર્યા કરતા વધુ બેઠક મેળવી રહ્યો છે.
પશ્ચિમ બંગાળમાં પણ ભાજપને ટીએમસી કરતા વધુ બેઠકો મળી રહી હોવાનું જણાય છે. તો દિલ્હીમાં પણ ભાજપ ક્લીન સ્વિપ કરી શકે છે. જો તમામ એક્ઝિટ પોલ સાચા ઠરે તો, મોદી નેહરુના રેકોર્ડની બરોબરી કરશે. નેહરુ બાદ મોદી એવા બીજા વડા પ્રધાન હશે જે સતત ત્રીજી વાર સરકાર બનાવશે.
