મહેમદાવાદ નજીક આવેલું સિદ્ધિ વિનાયક મંદિર ગણેશજીના શરીર જેવી આકૃતિ ધરાવતું દેશનું સૌથી મોટું ગણેશ મંદિર છે. અમદાવાદ-ડાકોર હાઇ-વે પર ૨૫ કિમી દૂર આવેલા મહેમદાવાદ પાસે વાત્રક નદીના કિનારે ૯ લાખ સ્ક્વેર કૂટ વિસ્તારમાં નિર્મિત મંદિરની લંબાઇ ૧૨૦ ફૂટ, ઊંચાઈ ૭૧ ફૂટ અને પહોળાઈ ૮૦ ફૂટ છે. મંદિરના ચોથા માળે મુંબઈના પ્રસિદ્ધ સિદ્ધિ વિનાયક ગણેશજીની પ્રતિકૃતિ સમાન ભવ્ય મૂર્તિની સ્થાપના કરવામાં આવી છે. પાંચ માળના આ વિશાળ મંદિરમાં ભાવિકો માટે અલગ સત્સંગ હૉલ બનાવવામાં આવ્યો છે. શાસ્ત્રોક્ત વિધિ વિધાનથી મંદિરનું નિર્માણ કરવામાં આવ્યું છે. દૂર દૂરથી આવતાં ભાવિકો મંદિરને નિહાળી ભાવવિભોર બની જાય છે.
અદભુત-અલૌકિક ડિઝાઈન
મંદિરના નિર્માણ માટે ઓસ્ટ્રેલિયન ટેકનોલૉજીનો ઉપયોગ કરવામાં આવ્યો છે. સોફટવેરની મદદથી મંદિરની ડિઝાઈનને આખરી ઓપ આપવામાં આવ્યો હતો. ડિઝાઈન એ આ મંદિરની ખાસિયત છે. મંદિરમાં ઠંડક રહે તે માટે પણ સિસ્ટમ ઊભી કરવામાં આવી છે. મંદિરના બાહ્ય સ્ટ્રક્ચરને હવામાન સામે રક્ષણ આપવા સિમેન્ટનો ઉપયોગ કરવામાં આવ્યો છે. મંદિર માત્ર ગુજરાતનું જ નહીં પરંતુ ભારતનું સૌથી મોટું ગણેશ મંદિર છે. તેનું કૅમ્પસ અત્યંત રળિયામણું છે. મહત્વની વાત એ છે કે, મંદિરનું નિર્માણ એક જ પરિવારનાં અનુદાનથી થયું છે.
અહીં મુંબઈ સિદ્ધિ વિનાયક ધામમાંથી જ્યોત લાવવામાં આવી હતી. ગુજરાતમાં સિદ્ધિ વિનાયક મંદિર એક પ્રવાસન ધામ તરીકે વિકસીત થયું છે અને દેશ-વિદેશથી ભાવિકો અહીં દર્શન કરવામાં આવે છે. મંદિરના પટ્ટાંગણમાં વિશાળ બગીચો છે જે વિવિધ ફૂલોના છોડવાઓથી સજાવવામાં આવ્યો છે. મંદિરમાં વિશ્વના ૧૦ જેટલા દેશોમાં સ્થાપિત ગણેશજીની પ્રતિકૃતિઓ પણ રજૂ કરવામાં આવી છે. મંદિરમાં ભાવિકોની સુવિધાઓ માટે તમામ વ્યવસ્થાઓ કરવામાં આવી છે.
વિશાળ પાર્કિંગ સ્પેસ, વૃદ્ધો અને દિવ્યાંગો માટે અલાયદી લિફટ અને રેમ્પની સગવડ છે. બહારથી આવતા ભાવિકોના રાત્રિ રોકાણ માટે ધર્મશાળા ઉપલબ્ધ છે. મંદિર ખાતે વ્યસન મુકિતનું ખાસ અભિયાન ચાલે છે. અનેક લોકો અહીં આવી વ્યસન છોડવાના પણ લે છે. મંદિરમાં વ્યસનમુકિત જ્યોત જળહળે છે.
- રાજકોટ ન્યુઝ
