સ્ટ્રીમબૉક્સ મીડિયાએ ભારતનું પહેલું સબસ્ક્રિપ્શન આધારિત TV OS લૉન્ચ કર્યું છે. માઇક્રોમેક્સના સહયોગમાં સ્ટાર્ટ-અપ કંપનીના સ્માર્ટ ટીવી ભારતની પહેલી ઓપરેટિંગ સિસ્ટમ DorOS પર આધારિત છે. સ્માર્ટ સ્ક્રિનમાં ગ્રાહકો 300થી વધુ લાઇવ ટીવી ચૅનલ્સ અને 24 ઓટીટી ઍપ્સ માણી શકશે. જેમાં અમેઝોન પ્રાઇમ વિડિયો, જિયો સિનેમા, ડિઝની પ્લસ હૉટસ્ટાર, સોની ટીવી, યુટ્યુબ, લાયન્સગેટ પ્લે, ઝી5 શેમારૂમી જેવા ઓટીટી ઍપ્સ સામેલ હશે. સ્ટ્રીમ બૉક્સ મીટિયાના સ્થાપક અને સીઇઓ અનુજ ગાંધીએ જણાવ્યું કે અમે નેટફ્લિક્સ સાથે પણ ચર્ચાવિચારણા કરી રહ્યા છીએ.
સ્ટાર્ટઅપ કંપનીના DorOSમાં 24 ઓટીટી ઍપ્સ અને 300થી વધુ ડિજિટલ ટીવી ચૅનલ્સનું એક્સેસ યુઝર્સને આપવામાં આવશે. કંપનીએ એના માટે 799 રૂપિયાનો માસિક સબસ્ક્રિપ્શન પ્લાન રાખ્યો છે. આ સબસ્ક્રિપ્શન પ્લાન આધારિત ટીવી ઓપરેટિંગ સિસ્ટમ તાતા પ્લે, ઍરટેલ એક્સટ્રીમ ટીવીને ટક્કર આપી શકે છે. આ ટીવી ઓપરેટિંગ સિસ્ટમમાં AI પાવર્ડ સર્ચ ફીચર આપવામાં આવ્યું છે. જેનાથી યુઝર્સ સરળતાથી તેમની પસંદગીના એન્ટરટેઇન્મેન્ટ પ્રોગ્રામની પસંદગી કરી શકે છે.
આ સાથે સ્ટ્રીમબૉક્સે આ ઓપરેટિંગ સિસ્ટમ ધરાવતા 4K QLED TV પણ લૉન્ચ કર્યા છે. જે 43, 55 અને 65 ઇંચમાં ઉપલબ્ધ છે. કંપની સૌપ્રથમ 43 ઇંચનું ટીવી 1 ડિસેમ્બર, 2024ને બજારમાં મુકી રહ્યું છે. જે ફ્લિપકાર્ટ પર જ મળી શકશે. બીજા બે મૉડેલ આવતા વરસે માર્કેટમાં આવશે. 43 ઇંચના મૉડેલની કિંમત 10,799 રૂપિયા રાખવામાં આવી છે. જેમાં ટીવી માટે 9,999 રૂપિયાનો વન ટાઇમ એક્ટિવેશન ચાર્જ અને 799 રૂપિયાનો મંથલી પ્લાન આપવામાં આવશે. ખાસ વાત એ છે કે યુઝર્સને પહેલા મહિના માટે ટીવી સાથે ફ્રી સબસ્ક્રિપ્શન આપવામાં આવશે. તો આગામી બાર મહિના માટે યુઝર્સે દર મહિને 799 રૂપિયાનો મંથલી પ્લાન લેવો પડશે. એક વરસ બાદ યુઝર્સ એની મરજી મુજબનો પ્લાન સબસ્ક્રાઇબ કરી શકશે.
