ભૂતપૂર્વ મેયર સહિત 7/11ના અનેક પદાધિકારીના નામો
વિધાનસભાના 145-146 મતવિસ્તારમાં નોંધાયા હોવાનો દાવો
લોકસભાના વિરોધ પક્ષના નેતા રાહુલ ગાંધીએ શરૂ કરેલા મત ચોરીના આક્ષેપનો રેલો મીરા-ભાયંદર સુધી પહોંચ્યો છે. મત ચોરીના કથિત પુરાવાઓ સાથે મીરા-ભાયંદરના વરિષ્ઠ કૉંગ્રેસી નેતા મુઝફ્ફર હુસેને ભાજપના વર્તમાન વિધાનસભ્ય નરેન્દ્ર મહેતા ભાજપના અનેક નેતાઓ વિરૂદ્ધ ગંભીર આક્ષેપો કર્યા હતા.
મુઝફ્ફર હુસેને આક્ષેપ કરતા જણાવ્યું કે મહારાષ્ટ્રની વિધાનસભાની ચૂંટણીમાં ભાજપે ચૂંટણી પંચ સાથે કુલડીમાં ગોળ ભાંગ્યો હતો. ભારતીય જનતા પાર્ટીએ ચૂંટણી પંચ સાથે મળીને મીરા-ભાયંદર વિધાનસભાની ચૂંટણીમાં મતોની ચોરી કરી હતી. મત ચોરી કાંડમાં મીરા-ભાયંદર ભાજપના ભૂતપૂર્વ મેયર, નગરસેવકો અને પક્ષના ઉચ્ચ પદાધિકારીઓ, વિધાનસભ્ય નરેન્દ્ર મહેતાની કંપની 7/11ના ડિરેક્ટરના નામ બંને મત વિસ્તારમાં હોવાનું મુઝફ્ફર હુસેને જણાવ્યું હતું.
આ સાથે કૉંગ્રેસના પ્રવક્તા દીપક બાગરીએ જણાવ્યું હતું કે અમે પુરાવા સાથે મત ચોરી થઈ હોવાનું પુરવાર કર્યું છે. ભૂતપૂર્વ મેયર ડિમ્પલ વિનોદ મહેતાનું (વોર્ડ નંબર સી-12) નામ 146 ઓવલા મજીવડા વિધાનસભા મતવિસ્તારમાં નોંધાયેલું છે. એ સાથે તેમનું નામ મીરા-ભાયંદર વિધાનસભા મતવિસ્તાર 145માં પણ નોંધાયેલું છે. મહાપાલિકાની ચૂંટણી દરમિયાન કરાયેલા એફિડેવિટમાં ડિમ્પલ મહેતાએ તેમનું ચૂંટણી ઓળખ પત્ર મજીવાડા મતવિસ્તારની યાદીમાં હોવાનું જણાવ્યું હતું. આમ છતાં 2024ની વિધાનસભાની ચૂંટણીમાં ડિમ્પલે મીરા-ભાયંદર મત વિસ્તારના સભ્ય માટે ભાયંદર પૂર્વમાં આવેલી ભારતી હાઈસ્કૂલ ખાતે મતદાન કર્યું હતું.
તો ડિમ્પલના પતિ વિનોદ લાલચંદ મહેતાનું નામ પણ 145 મીરા-ભાયંદર વિધનસભા મતવિસ્તારમાં દાખલ કરવામાં આવ્યું છે. ઉપરાંત ભૂતપૂર્વ નગરસેવક સંજય થેરાડે, તેમનાં પત્ની વનિતા, ભૂતપૂર્વ નગરસેવિકા કુસુમ ગુપ્તા અને તેમના પતિ સંતોષ ગુપ્તા, રવિકાંત ઉપાધ્યાય અને તેમનાં પત્ની શીતલના નામ પણ મતદાર યાદીમાં ઉમેરવામાં આવ્યા. એ સિવાય નરેન્દ્ર મહેતાની કંપની 7/11ના ડિરેક્ટર સખારામ સુર્વેનું નામ પણ 145ની મતદાર યાદીમાં ઉમેરવામાં આવ્યું જેથી ભાજપના ઉમેદવારને એનો લાભ મળી શકે.
મુઝફ્ફર હુસેને વધુમાં જણાવ્યું કે, બે મતદાર ક્ષેત્રની મતદાર યાદીમાં નામ હોવા અંગેની ઔપચારિક ફરિયાદ ચૂંટણી અધિકારીને કરવા છતાં તેમણે કોઈ કાર્યવાહી કરી નહોતી. ભાજપના ભૂતપૂર્વ મેયર અને નગરસેવકોએ લોકપ્રતિનિધિત્વ અધિનિયમનું ઉલ્લંઘન કર્યું છે.
કૉંગ્રેસના પ્રવક્તા દીપક બાગરીએ જણાવ્યું કે આ મામલે તલસ્પર્શી તપાસ થવી જોઇએ અને સંબંધિતો વિરૂદ્ધ કેસ નોંધાવો જોઇએ. એટલું જ નહીં, કૉંગ્રેસ દ્વારા સેંકડો ડબલ નામો અંગે ચૂંટણી પંચના અધિકારીઓને ફરિયાદ કરી હોવા છતાં કોઈ કાર્યવાહી કરવામાં આવી નથી.
