મીરા-ભાઈંદરના ડોંગરી વિસ્તારમાં પ્રસ્તાવિત મેટ્રો કાર શેડ પ્રોજેક્ટ આખરે રદ થવાની દિશામાં આગળ વધી રહ્યો છે. પરિવહન પ્રધાન પ્રતાપ સરનાઈકે જણાવ્યું કે સરકાર ટૂંક સમયમાં આ બાબતનું સત્તાવાર જાહેરનામું બહાર પડાશે. સ્થાનિક નાગરિકોના સતત વિરોધ, પર્યાવરણીય ચિંતાઓ અને ટેકનિકલ અવરોધોના આધારે આ મહત્વપૂર્ણ નિર્ણય લેવામાં આવ્યો છે.
મુંબઈ મેટ્રોપોલિટન રિજન ડેવલપમેન્ટ ઓથોરિટી (MMRDA) ખાતે યોજાયેલી સમીક્ષા બેઠક બાદ પ્રતાપ સરનાઈકે મીડિયાને માહિતી આપી હતી. બેઠકમાં મેટ્રોપોલિટન કમિશનર અશ્વિન કુમાર મુદગલ, થાણે મ્યુનિસિપલ કમિશનર સૌરભ રાવ, મીરા-ભાઈંદર કમિશનર રાધા બિનોદ શર્મા અને પર્યાવરણીય કાર્યકર ધીરજ પરબ સહિતના અધિકારીઓ હાજર રહ્યા હતા.
ડોંગરી કાર શેડ માટે જરૂરી મોટી જમીન, વન નાબૂદીની શક્યતા અને ટ્રાફિક સમસ્યાઓને ધ્યાનમાં રાખીને સ્થાનિકો, પર્યાવરણીય કાર્યકરો અને અનેક સંગઠનો લાંબા સમયથી વિરોધ કરી રહ્યા હતા. સરકારે તમામ મુદ્દાઓની વિગતવાર સમીક્ષા કરી અને વૈકલ્પિક સ્થળના વિકલ્પોને વધુ યોગ્ય ગણાવ્યા છે.
પ્રતાપ સરનાઈકે જણાવ્યું કે જાહેરનામું બહાર પડતાં જ નવા કાર શેડ માટેનું સ્થળ નક્કી કરવાની પ્રક્રિયા ઝડપી કરવામાં આવશે. મેટ્રો પ્રોજેક્ટ સમયસર પૂર્ણ થાય તે માટે સરકાર સંપૂર્ણ આયોજન સાથે આગળ વધી રહી છે.
સરકારના આ નિર્ણયથી ડોંગરીના રહેવાસીઓ તેમજ પર્યાવરણીય કાર્યકરોમાં સંતોષની લાગણી જોવા મળી રહી છે.
