ભારતીય નૌકાદળની ક્ષમતાઓને વધુ મજબૂત બનાવતી એક ઐતિહાસિક ઘટના તરીકે *INAS 335 ‘ઓસ્પ્રેઝ’*નું કમિશનિંગ 17 ડિસેમ્બર 2025ના રોજ ગોવામાં આવેલા INS હંસા ખાતે કરવામાં આવ્યું. આ સ્ક્વોડ્રન MH-60R હેલિકોપ્ટર ઓપરેટ કરતું ભારતીય નૌકાદળનું બીજું એર સ્ક્વોડ્રન બન્યું છે. આ સમારોહમાં નૌકાદળના વડા એડમિરલ દિનેશ કે. ત્રિપાઠીની ઉપસ્થિતિએ કાર્યક્રમને વિશેષ ગૌરવ આપ્યું.
કમિશનિંગ વોરંટનું વાચન સ્ક્વોડ્રનના કમાન્ડિંગ ઓફિસર કેપ્ટન ધીરેન્દ્ર બિષ્ટ દ્વારા કરવામાં આવ્યું, ત્યારબાદ નૌકાદળના વડાએ કમિશનિંગ પ્લાકનું અનાવરણ કર્યું. પશ્ચિમ નૌકાદળ કમાન્ડના ફ્લેગ ઓફિસર કમાન્ડિંગ-ઇન-ચીફ વાઈસ એડમિરલ કૃષ્ણ સ્વામીનાથન સહિત અનેક વરિષ્ઠ અધિકારીઓ, પૂર્વ નૌકાદળ વડા એડમિરલ કરમબીર સિંહ (નિવૃત્ત), નૌકાદળના વેટરન્સ અને આમંત્રિત મહેમાનો હાજર રહ્યા. પરંપરાગત વોટર કેનન સેલ્યુટ દ્વારા આ ઐતિહાસિક ક્ષણને ઉજવવામાં આવી.
MH-60R હેલિકોપ્ટર દિવસ-રાત તમામ હવામાનમાં કાર્યક્ષમ છે. એન્ટી-સબમરીન વૉરફેર, એન્ટી-સર્ફેસ વૉરફેર, સર્ચ એન્ડ રેસ્ક્યુ, મેડિકલ ઈવેક્યુએશન અને વર્ટિકલ રિપ્લેનિશમેન્ટ જેવી ક્ષમતાઓ સાથે આ હેલિકોપ્ટરો પશ્ચિમ તટ પર ભારતીય નૌકાદળની હવાઈ શક્તિને નોંધપાત્ર રીતે વધારશે. INAS 335નું કમિશનિંગ ભારતની સમુદ્રી સુરક્ષાને નવી ઉંચાઈ આપનાર મહત્વપૂર્ણ પગલું ગણાશે.
