ભારતમાં હજુ ફાઇવ-જીની શરૂઆત થઈ નથી ત્યાં પર્યાવરણને નુકસાન થઈ શકે છેની દલીલ સાથે જુહી ચાવલાએ કોર્ટમાં અરજી કરી. જોકે કોર્ટે અભિનેત્રીને આડે હાથ લઈ આવી અરજી પ્રસિદ્ધિ માટે કરી હોવાનું જણાવી વીસ લાખ રૂપિયાનો દંડ ફટકાર્યો હતો. પણ એક વાત ચોક્કસ, અભિનેત્રીએ કરેલી અરજીને કારણે ફાઇવ-જીને ઘણી પ્રસિદ્ધિ મળી. એ સાથે ફાઇવ-જી ઇનેબલ્ડ સ્માર્ટ ફોનના નવા મૉડેલ પણ અનેક સ્માર્ટફોન કંપનીઓ બજારમાં મુકી રહી છે. હજુ ભારતમાં ફાઇવ-જીએ પા-પા પગલી પણ માંડી નથી ત્યારે ફાઇવ-જી ઇનેબલ્ડ ફોન લેવા કે નહીં એની ઘણા દ્વિધા અનુભવી રહ્યા છે. જેઓ નવો ફોન ખરીદવાનું પ્લાનિંગ કરી રહ્યા છે તેમણે ફાઇવ-જી ઇનબિલ્ડ ફોન લેતા પહેલાં અમુક બાબતો ધ્યાનમાં રાખવા જેવી છે.
હજુ ભારતમાં ફાઇવ-જી નેટવર્ક લૉન્ચ થવામાં વિલંબ થઈ શકે છે. ઉપરાંત ટેલિકમ્યુનિકેશન ડિપાર્ટમેન્ટે ભારતના અમુક મહત્ત્વના શહેરોમાં જ ફાઇવ-જીની ટ્રાયલ માટે પરવાનગી આપી છે. એટલે દેશભરમાં ફાઇવ-જી નેટવર્ક લૉન્ચ થવામાં ઘણો સમય લાગી શકે છે. એટલે જો તમે આજની તારીખમાં મળતો શ્રેષ્ઠ ફાઇવ-જી ફોન નેટવર્ક શરૂ થાય ત્યાં સુધીમાં તો જૂનો થઈ ગયો હશે. ફાઇવ-જી નેટવર્ક શરૂ થતાં ઓછામાં ઓછો બે-અઢી વરસનો સમય લાગી શકે છે. આટલા ગાળામાં નવા ફીચર્સના શોખીન ઘણા લોકો તેમનો સ્માર્ટફોન બદલી નાખતા હોય છે.
બીજું મહત્ત્વનું કારણ છે કે અત્યારે જે કિમતમાં ફાઇવ-જી સ્માર્ટ ફોન મળે છે એનો ભાવ બે વરસમાં ગગડી જશે. ઉપરાંત ફાઇવ-જી નેટવર્ક શરૂ થાય ત્યાં સુધીમાં અનેક નવા ફીચર્સ ધરાવતા સ્માર્ટ ફોન ઓછી કિમતમાં પણ ઉપલબ્ધ થઈ શકે છે. જોકે ફાઇવ-જી માટેના ઇન્ટરનેટ પ્લાન કદાચ ફોર-જી કરતા વધુ હોઈ શકે છે. બીજું, અત્યારે ઓછી કિમતે મળતા ફાઇવ-જી સ્માર્ટ ફોનમાં ઉત્પાદકોએ પ્રોસેસર, બેટરી, કેમેરા જેવા ફીચર્સમાં બાંધછોડ કરી હોય એવું પણ બની શકે છે. એટલે નિષ્ણાતોનું કહેવુ છે કે જ્યાં સુધા તમારા વિસ્તારમાં ફાઇવ-જી નેટવર્ક શરૂ ન થાય ત્યાં સુધી ફાઇવ-જી ફોન ખરીદવાની ઉતાવળ કરવી નહીં.
