સમાજના અંતિમ સ્તર સુધી સંવાદ સાધી ભાજપે ચૂંટણી પ્રચારને આપ્યો નવો આયામ
મુંબઈ મહાપાલિકાની ચૂંટણીને લઈને ભાજપે પ્રચારમાં નવીનતા અને સામાજિક જોડાણ પર ખાસ ભાર મૂક્યો છે. પરંપરાગત રેલીઓ અને સભાઓથી આગળ વધી, શહેરના સામાન્ય અને મહેનતકશ વર્ગ સુધી પહોંચવાના હેતુથી ભાજપે હવે બૂટપોલિશ વ્યવસાયિકોને પણ સીધો સંવાદ સાધ્યો છે. આ પહેલને ચૂંટણી પ્રચારનો અનોખો ‘ફંડો’ ગણવામાં આવી રહ્યો છે.
ભાજપે લોકસભા અને વિધાનસભાની જેમ જ મહાપાલિકા ચૂંટણી પણ અત્યંત गांભીરતાથી લડવાની તૈયારી શરૂ કરી દીધી છે. વિવિધ સમાજો, જાતિ સમુદાયો અને સ્થાનિક સંગઠનો સાથે સંપર્ક વધારતા ભાજપે હવે મુંબઈના બૂટપોલિશવાળાઓને પણ પ્રચારના કેન્દ્રમાં સ્થાન આપ્યું છે. સોમવારે શહેરના સૈંકડો બૂટપોલિશ વ્યવસાયિકોને મુંબઈ ભાજપ કાર્યાલયમાં આમંત્રિત કરવામાં આવ્યા હતા.
શહેરના દરેક રેલ્વે સ્ટેશન અને મુખ્ય વિસ્તારોમાં બૂટપોલિશ કરીને રોજગાર મેળવનારા હજારો લોકો કાર્યરત છે. પરવાનગી, રોજગારની અનિશ્ચિતતા, અચાનક કાર્યવાહી અને પરિવારની જવાબદારી જેવી અનેક સમસ્યાઓનો તેઓ સામનો કરે છે. આ મુશ્કેલીઓ સમજીને તેનો ઉકેલ શોધવાના ઉદ્દેશથી ભાજપે આ બેઠકનું આયોજન કર્યું હોવાનું મુંબઈ ભાજપના અધ્યક્ષ અમિત સાટમએ જણાવ્યું.
આ પહેલાં ભાજપે માળી, ભંડારી સહિત અનેક સમાજોના મેળાવડા યોજ્યા હતા. સાથે જ મુંબઈની જીવનરેખા ગણાતી લોકલ ટ્રેનોમાં ભજન ગાતા ભજની મંડળો સાથે પણ સંપર્ક સાધવામાં આવ્યો હતો. સામાન્ય નાગરિકો સાથે સીધો સંવાદ સાધી, તેમની સમસ્યાઓને એજન્ડામાં સામેલ કરવાનો પ્રયાસ ભાજપના પ્રચારને વધુ જનસ્પર્શી બનાવે છે.
