યુક્રેન અને રશિયા વચ્ચે ચાલી રહેલા યુદ્ધને પગલે યુક્રેનમાં ફસાયેલા ભારતીય અને ગુજરાતના યુવા વિદ્યાથીઓને ઓપરેશન ગંગા અંતર્ગત પ્રધાન મંત્રી નરેન્દ્ર મોદીના માર્ગદર્શન અને પ્રયાસોથી સ્વદેશ લાવવામાં આવી રહ્યા છે.
ઓપરેશન ગંગા અન્વયે આવેલી પહેલી બે ફલાઇટમાં ગુજરાતના 100 જેટલા યુવા વિદ્યાર્થીઓ પાછા તેમના વતન આવી પહોંચ્યા છે. મુંબઈ પહોંચેલી ફ્લાઇટમાં ગુજરાતના 44 વિદ્યાર્થીઓ હતા જેઓ રવિવારે બસ દ્વારા મુંબઈથી અમદાવાદ લઈ જવાયા હતા. જ્યારે દિલ્હી પહોંચેલી ફ્લાઇટમાં આવેલા ગુજરાતના 60 કરતા વધુ વિદ્યાર્થીઓ આજે સવારે ગાંધીનગર પહોંચ્યા હતા. ગુજરાત સરકારે દિલ્હી પહોંચેલા વિદ્યાર્થીઓને ગુજરાત લાવવા ખાસ વોલ્વો બસની વ્યવસ્થા કરી હતી.
મુખ્યમંત્રી ભૂપેન્દ્ર પટેલે દિલ્હીથી વોલ્વો બસ મારફતે આજે વહેલી સવારે ગુજરાત પહોંચેલા યુવાઓને ગાંધીનગર સર્કિટ હાઉસ ખાતે પુષ્પ ગુચ્છ આપીને આવકાર્યા હતા અને તેમના ક્ષેમકુશળ પૂછ્યા હતા
મુખ્યમંત્રીએ યુક્રેનથી આવેલા યુવાઓ સાથે વાતચીત કરી હતી તેમજ રાજ્ય સરકાર તેમની મદદ માટે તત્પર હોવાનો સધિયારો વાલિઓને આપ્યો હતો.
શિક્ષણ મંત્રી જીતુભાઈ વાઘાણી તેમજ અગ્ર સચિવ હૈદર, ગાંધીનગર કલેકટર કુલદીપ આર્ય વગેરે આ પ્રસંગે ઉપસ્થિત રહ્યા હતા.
વિદ્યાથીઓ તેમ જ તેમના માતા પિતાએ હેમખેમ વતન પરત લાવવાની વ્યવસ્થા માટે પ્રધાન મંત્રી નરેન્દ્ર ભાઈ મોદીનો તેમજ ગુજરાત સુધી પહોંચાડવાની સુવિધા માટે મુખ્યમંત્રી ભૂપેન્દ્ર પટેલનો આભાર માન્યો હતો.
