વિધાનસભ્ય સંજય ઉપાધ્યાયની પહેલઃ બસ, રિક્ષા-ટેક્સીથી લઈને અનધિકૃત ફેરિયાઓ મુદ્દે ચર્ચા
બોરિવલી પૂર્વ રેલવે સ્ટેશનની બહાર રોજની ટ્રાફિક સમસ્યાથી પરેશાન નાગરિકો અને રેલવે મુસાફરોને ટૂંક સમયમાં રાહત મળે તેવી દિશામાં કાર્યવાહી શરૂ થઈ છે.
બોરિવલીના વિધાનસભ્ય સંજય ઉપાધ્યાયે મુસાફરો સાથે સીધો સંવાદ સાધી તેમની સમસ્યાઓ જાણી અને તેના ઉકેલ માટે સંબંધિત વિભાગો સાથે સંકલન શરૂ કર્યું છે.
રેલવે મુસાફરોની સમસ્યાઓના નિરાકરણ માટે શરૂ કરાયેલા વિશેષ ઉપક્રમ અંતર્ગત સંજય ઉપાધ્યાયે બોરિવલી પૂર્વ સ્ટેશનની બહાર મુસાફરો સાથે મુલાકાત કરી હતી. મુસાફરોની સમસ્યાઓ રેલવે પ્રધાન અશ્વિની વૈષ્ણવ સમક્ષ રજૂ કરી યોગ્ય ઉકેલ લાવવાનો તેમણે વિશ્વાસ વ્યક્ત કર્યો હતો.
સ્ટેશન બહારની ટ્રાફિક સમસ્યા ઘટાડવા માટે કસ્તુરબા પોલીસ સ્ટેશન ખાતે સિનિયર પોલીસ ઇન્સ્પેક્ટર બાળાસાહેબ બનકર અને ટ્રાફિક પોલીસ ઇન્સ્પેક્ટર બ્રહ્માનંદ સૂર્યવંશી સાથે મહત્વપૂર્ણ બેઠક યોજાઈ હતી. બેઠકમાં બેસ્ટની બસો, રિક્ષા અને ટેક્સીના વ્યવસ્થિત સંચાલન, બહારથી આવતા વાહનો માટે ટ્રાફિક મેનેજમેન્ટ, શેર રિક્ષાના નિયમન તેમજ અનધિકૃત ફેરિયાઓને દૂર કરવા અંગે વિગતવાર ચર્ચા કરવામાં આવી હતી.
આગામી બે-ત્રણ મહિનામાં આ ઉપાયો અમલમાં મૂકીને બોરિવલીવાસીઓને ટ્રાફિક જામમાંથી રાહત આપવાનો પ્રયાસ કરવામાં આવશે. એ સાથે જ બોરિવલી રેલવે સ્ટેશનને વધુ સુરક્ષિત, સ્વચ્છ અને સુવિધાસભર બનાવવાની દિશામાં પણ કામ થશે. ખાસ કરીને તમામ પ્રસાધનગૃહોના નવિનીકરણ અને તેમની કાયમી સ્વચ્છતા જાળવવાને પ્રાથમિકતા અપાશે, વિધાનસભ્ય સંજય ઉપાધ્યાયે અંતમાં જણાવ્યું હતું.
