સ્કોલરશિપ કાર્યક્રમના શુભારંભ સાથે યુવા પ્રતિભાને પ્રોત્સાહન, રૅમ્પ વૉકમાં છવાઈ યુવાશક્તિ
શિક્ષણ, સેવા અને મહિલા સશક્તિકરણને સમર્પિત વિમેન ગ્રેજ્યુએટ્સ યુનિયન (WGU)એ પોતાનો 111મો સ્થાપના દિવસ ગૌરવ અને ઉત્સાહભેર ઉજવ્યો. કોલાબા સ્થિત અમી રુસ્તમજી હોલ ખાતે યોજાયેલી આ ઉજવણીમાં સ્કોલરશિપ કાર્યક્રમ 2026નો શુભારંભ તેમજ આંતર-મહાવિદ્યાલય રૅમ્પ વૉક સ્પર્ધાનું પણ આયોજન કરવામાં આવ્યું હતું. ત્રણ સત્રોમાં યોજાયેલો આ કાર્યક્રમ શિક્ષણ, પ્રતિભા અને મહિલા સશક્તિકરણનો સુંદર સંગમ બની રહ્યો.
ઉજવણીના પ્રથમ સત્રમાં પ્રેસ કોન્ફરન્સ યોજાઈ હતી, જેમાં વિવિધ મીડિયા પ્રતિનિધિઓ ઉપસ્થિત રહ્યા હતા. ત્યારબાદ મુખ્ય સમારંભનો પ્રારંભ પરંપરાગત દીપ પ્રાગટ્યથી થયો. WGUનાં પ્રમુખ શ્રીમતી ઇલા દલાલે મહાનુભાવોનું સ્વાગત કરી સંસ્થાના 111 વર્ષના ગૌરવપૂર્ણ વારસાને યાદ કર્યો.
કો-ઓર્ડિનેટિંગ ટ્રસ્ટી અને સ્કોલરશિપ કમિટીનાં ચેરપર્સન એડવોકેટ ગૌરી છાબરિયાએ સ્કોલરશિપ કાર્યક્રમ 2026 અંગે માહિતી આપતાં ઉચ્ચ શિક્ષણ માટે લાયક અને જરૂરિયાતમંદ વિદ્યાર્થીઓને મદદરૂપ થવાના સંસ્થાના પ્રયાસો પર પ્રકાશ પાડ્યો.
મુખ્ય અતિથિ CA પ્રફુલ્લા છાજેડે મહિલા સશક્તિકરણ અને શિક્ષણના મહત્વ અંગે પ્રેરણાદાયી સંબોધન કર્યું. આ પ્રસંગે તેમનું સન્માન કરવામાં આવ્યું, જ્યારે ઉદાર દાતાઓ, ભૂતપૂર્વ પ્રમુખો, ટ્રસ્ટીઓ અને વરિષ્ઠ સભ્યોને પણ તેમના યોગદાન બદલ સન્માનિત કરાયા. સ્કોલરશિપ અરજીપત્રો, બ્રોશર્સ, ફ્લાયર્સ તથા WGU ટી-શર્ટનું વિમોચન પણ કરવામાં આવ્યું.
WGU સ્ટડી સેન્ટરના બાળકોએ દેશભક્તિના ગીતો પર સુંદર નૃત્ય રજૂ કર્યું અને બાળકોને સ્કૂલ બૅગ, પાણીની બોટલ, નોટબુક તથા સ્ટેશનરીનું વિતરણ કરાયું.
કાર્યક્રમના અંતિમ સત્રમાં યોજાયેલી આંતર-મહાવિદ્યાલય રૅમ્પ વૉક સ્પર્ધામાં યુવાઓનો આત્મવિશ્વાસ અને સર્જનાત્મકતા જોવા મળી. મણિબેન નાણાવટી વિમેન્સ કોલેજે પ્રથમ, જ્યારે બેરિસ્ટર એ. આર. અંતુલાય કોલેજ ઑફ લૉએ દ્વિતીય પારિતોષિક મેળવ્યું.
આ સમગ્ર ઉજવણી WGUના 111 વર્ષના વારસા સાથે શિક્ષણ, સેવા, યુવા શક્તિ અને મહિલા સશક્તિકરણની પ્રતિબદ્ધતાને વધુ મજબૂત બનાવતી યાદગાર બની રહી.
