કચ્છના દંતકથા સમાન પોલીસ અધિકારી દિલીપ અગ્રાવતના રોમાંચક અને જોખમી જીવનપ્રસંગોને આધારે જાણીતા સાહિત્યકાર તથા પત્રકાર પ્રફુલ શાહ રચિત ડૉક્યુ-નોવલ સરહદનો સુપરકોપનું વિમોચન ૬ ડિસેમ્બરે અમદાવાદમાં થવા જઈ રહ્યું છે. નવભારત સાહિત્ય મંદિર દ્વારા આયોજિત આ સમારંભમાં નિવૃત્ત ડીજીપી એ. કે. સિંહના હસ્તે પુસ્તકનું વિમોચન થશે, જ્યારે ફિલ્મ દિગ્દર્શક જયંત ગિલાટર અને વિજય કોટક વિશિષ્ટ અતિથિ તરીકે ઉપસ્થિત રહેશે. પુસ્તકના હીરો દિલીપ અગ્રાવતનો પરિચય પત્રકાર વિપુલ એન. વૈધ કરશે.
૩૪ વર્ષની તેજસ્વી કારકિર્દીમાં દિલીપ અગ્રાવતે કચ્છના જોખમી અને સરહદી વિસ્તારમાં અનેક દિલધડક કામગીરીઓ પાર પાડીને વાસ્તવિક સુપરકોપ તરીકેની લોકપ્રિયતા મેળવી છે. માત્ર એક રિવોલ્વર સાથે સાત પાકિસ્તાની દૂષ્કર્મીઓને પકડવાની ઘટના હોય કે આરડીએક્સ-હથિયારોના જથ્થાનો ભાંડાફોડ, જૈશના આતંકવાદીને જેલભેગો કરવાનો હોય કે ઊંટના પગેરા પરથી મહિના સુધી તપાસ કરીને દેશ વિરોધી કાવતરું નિષ્ફળ બનાવવું—આ બધું તેમની અડગ સાહસિકતા અને ફરજ પ્રત્યેની નિષ્ઠનું જીવંત ઉદાહરણ છે.
નવલકથામાં તેમની કામગીરી દરમિયાન પકડાયેલા કુલ ૭૯ કિલો આરડીએક્સ, અનેક એકે-૫૬, પિસ્તોલ-ગ્રેનેડ, તથા ત્રણ સનસનાટીભર્યા એન્કાઉન્ટરની વિગત રોમાંચક રીતે વર્ણવાઈ છે. અગ્રાવતના આતંકવાદ વિરોધી લડતમાં આપેલા ફાળા માટે તેમને રાષ્ટ્રપતિ ચંદ્રક સહિત અનેક સન્માનો મળ્યા છે.
ચારે ભાષામાં ૫૦થી વધુ પુસ્તકોના સર્જક પ્રફુલ શાહનું આ કચ્છ આધારિત ચોથું પુસ્તક છે. લવ યુ કચ્છ, કચ્છ ફાઇલ અને લાઇફ ઇમ્પોસિબલ પછીનું આ સર્જન ફરી એક વાર કચ્છની ધરતીને કેન્દ્રમાં રાખી વાચકોને દિલધડક સાહસિક અનુભવોની સફર કરાવશે.
