મુંબઈની રિયલ એસ્ટેટની લક્ઝરી માર્કેટ પર નજર રાખતા ડાટા ઇન્ટેલિજન્સ એન્ડ એસ્ટેટ મેનેજમેન્ટ સ્ક્વેર યાર્ડના જણાવ્યા મુજબ મુંબઈમાં 2021ના પહેલા છ મહિનાના ગાળામાં ચાર હજાર કરોડ રૂપિયાના લક્ઝરી ફ્લૅટના સોદા થયા હતા. આમાં 15 કરોડ રૂપિયા કરતા વધુના સોદા થયા હોય એની જ ગણતરી કરવામાં આવી છે. સ્ક્વેર યાર્ડના જણાવ્યા મુજબ 15થી 20 કરોડ રૂપિયાની કેટેગરીમાં થયેલા સોદાનું પ્રમાણ 45 ટકા જેટલું છે. તો 10 ટકા જેટલા સોદા 30-50 કરોડના બજેટના થયા છે.
જેમણે મોંઘા ઘર ખરીદ્યા છે એની યાદીમાં બૉલિવુડની ચાર હસ્તીઓનો પણ સમાવેશ થાય છે. લક્ઝરી ફ્લૅટ ખરીદનારાઓમાં અમિતાભ બચ્ચન, આનંદ એલ. રાય, સની લિયોની અને વિપુલ એ. શાહનો સમાવેશ થાય છે.
સ્ક્વેર યાર્ડે પ્રસિદ્ધ કરેલા લિસ્ટ ઑફ મોસ્ટ એક્સપેન્સિવ હૉમ્સ ઇન મુંબઈમાં જણાવ્યા મુજબ આ ચારેય ફિલ્મી હસ્તીઓમાં સૌથી મોંઘી પ્રોપર્ટી અમિતાભ બચ્ચનની છે. તેમણે 31 કરોડ રૂપિયામાં મિલકત ખરીદી છે. ત્યાર બાદ આનંદ એલ. રાયનો ક્રમાંક છે. આનંદે 25.30 કરોડ રૂપિયા લકાઝરી પ્રોપર્ટી ખરીદવા ચુકવ્યા છે. તો પોર્નસ્ટારમાંથી બૉલિવુડની અગ્રણી અભિનેત્રી બનેલી સની લિયોનીએ 16 કરોડ રૂપિયામાં એનું સપનાનું ઘર ખરીદ્યું છે. તો ગુજરાતી ફિલ્મ દરિયા છોરુથી કરિયરની શરૂઆત કરી બૉલિવુડના ટોચના નિર્માતા-દિગ્દર્શક તરીકે સ્થાન મેળવનાર વિપુલ એ. શાહે તેમના આશિયાના માટે 15.27 કરોડ રૂપિયા ચુકવ્યા છે. આ તમામ લક્ઝરી પ્રોપર્ટી ચાર હજાર ચોરસફૂટ કે એથી વધુનું ક્ષેત્રફળ ધરાવે છે.
